Gikumpirma ni Pangulong Ferdinand Marcos Jr., nga makauli na sa Pilipinas ang Pinay drug mule convict nga si Mary Jane Veloso, human ang kapin sa usa ka dekadang pakig-istorya og apela sa Indonesian government.
Si Veloso nahukman og silot kamatayon sa Indonesia.
Gibutyag sa Pangulo nga sa kapin usa ka dekadang paningkamot nga i-delay ang execution kang Maryjane og karon nagbunga na nga hingpit nga masalbar ang kinabuhi ni Veloso.
Kalabotan niini, nagpadangat si Pangulong Marcos kang Indonesian President Prabowo Subianto og kinasingkasing nga pasalamat ingon man sa gobyerno sa Indonesia sa matu pa kaayo niini.
Ang lakang sa Indonesia sumala sa Pangulo ang nagpakita sa lalom nga relasyon sa duha ka nasod isip magkaalyadong nasyon og nagkahiusa sa tumong alang sa hustisya og pagpakabana.
Gidugang usab sa Pangulo nga ang istorya ni Mary Jane ang nakatandog sa daghang kasingkasing, usa ka inahan nga naipit sa kalisdanan nga mihimo og usa ka desperadong desisyon nga nagbag-o sa dagan sa iyang kinabuhi.
Ug bisag gipanubag si Maryjane Veloso ilawom sa balaud sa Indonesia, gibutyag sa Pangulo nga nagpabilin siya nga biktima sa sirkumstansiya.
