Nagsentro sa importansiya sa padayon nga pakigbatok alang kagawasan ilabi na ang proteksyon alang sa teritoryo ug sa soberanya sa nasud ang mensahe ni President Ferdinand Marcos Jr. dungan sa selebrasyon sa 126th Independence Day sa Pilipinas.
Gi-engganyo ni Presidente Marcos ang mga Pinoy nga pukawon ang espiritu sa pagka-Pilipino, buhion ang nasyonalismo sa dugo, ug magpartisipar sa mga selebrasyon alang sa Independence Day.
Hangtod karon sumala sa presidente, padayon ang pagpakigbisog alang sa kagawasan gani nga walay kakapoy nga nabatyagan sa pagbantay, walay katapusan ang pagpakigbisog sa uban nga mga nasud aron nga matabangan ang Pilipinas nga mapakusog ang mga interes niini ug padayon usab ang mga proyekto nga pang-kultura aron nga mas mapalig-on pa ang identity isip mga Pilipino.
May kalabotan usab sa selebrasyon karong adlawa, gipahigayon ang Parada ng Kalayaan: Grand Parade of Local Government Floats” sa Quirino Grandstand kun asa 10 ka local government units ang naimbitaran sa grand parade.
Lakip sa misalmot sa floats mao ang Candon City sa Ilocos Sur, Cebu, Cavite, Aurora, Bulacan, Negros Occidental, Iloilo, Surigao del Norte, Jolo sa Sulu Province, ug ang Zamboanga City.
Sa parade float sa Iloilo, gipakita ang Cry of Santa Barbara ug ang establisiemento sa Federal State of the Visayas.
Kahibaluan nga ang public plaza sa Santa Barbara mao ang lugar kun asa una nga giwagayway ang bandila sa Pilipinas sa gawas sa Luzon lima ka bulan human gideklara ni General Emilio Aguinaldo ang Philippine Independence sa Kawit, Cavite.
Sa Parada ng Kalayaan, mipartisipar usab ang mga local government officials ug mga national government agencies.
