GENERAL SANTOS CITY – Karong adlawa gilauman nga muabot ang patayng lawas sa laing taga GenSan nga sundalo nga namatay sa engkwentro sa Marawi City. Kini human nga wala mahinayon kagahapon ang pag-abot sa GenSan Airport ang eroplanong gisakyan kay Private First Class Felmark Dalugdog, 27 anyos.
Kini tungod sa maut nga panahon kagahapon.
Ang nasampit, scout ranger sa 2nd scout ranger batallion ng taga Prk. Lanoy Brgy. Calumpang ning syudad.
Manguna sa pagsugat kay PFC Dalugdog sa airport ang asawa niini og mga ginikanan. Gilauman nga usa ka hero’s welcome ang ihatag ngadto sa bayaning si PFC Dalugdog.
Kahibaluan, gihatagan sa lokal nga panggamhanan sa dakbayan og heros burial si PFC Marvin Gomez nga taga Lower Puting Bato, Calumpang sa lubong niini kagahapon sa Forest Lake Cemetery.
Mibuhos sa simbahan hangtud sa paghatud sa ulahing kapahulayan kay PFC Gomez ang mga kaubanan nga sundalo, mga higala, silingan og mga kabanay.
Gipakita sa mga nasampit ang ilang pagsaludo sa pagsul-ob ug tshirt kulay puti nga may hulagway ni PFC Gomez.
Nasayran nga gipahigayon ang 21 gun salute sa sam-ang, simbolo sa pag-ila sa pagbuhis ni Gomez sa iyang kinabuhi alang sa nasud.
