GENERAL SANTOS CITY – Nailhan na ang patay’ng lawas nga nakaplagan kagahapon sa buntag sa Silway River Bulaong Extension, Brgy Labangal ning dakbayan.
Sa labing ulahing report, giila ang biktima nga si Jamal Abdul Deca, 25-anyos, first year student sa Cronasia Foundation College, ug residente sa Rambutan St. Brgy Dadiangas East ning siyudad.
Kahibaluan nga gibutyag sa Bombo Radyo ni Prk Chairman Giovanni Nicor nga nakaplagan sa mga residente sa lugar ang nasampit nga patay’ng lawas samtang naglutaw sa nasampit nga sapa.
Narekober usab ang slig bag ug cellphone niini.
Matud sa taga-Scene of the Crime Operatives o SOCO, gituuhang gipaantos una ang biktima gumikan sa nakita nga upat ka samad-dinunggaban sa lawas, ug gigulgulan pa ang liog.
Gituuhan usab nga sa lugar mismo gihimo ang krimen gumikan sa mga pat-ak sa dugo nga nakita sa lugar, ug namatikdan usab matud pa sa mga residente nga nagbanha ang mga iro bandang kaadlawon ug may mga nagdinaganay una ang pagkakaplag sa patay’ng lawas pagkabuntag.
Nakuha na sa iyang pamilya ang patay’ng lawas sa biktima, kung asa hustiya ang ilang singgit alang sa gipatay nga mahal sa kinabuhi.
Sa karon nagpadayon ang ginahimong imbestigasyon sa kapulisan aron mailhan ang mga responsable ug motibo sa maong krimen.
