POLOMOLOK,SOUTH COTABATO- Upat na ang nahimong namatay sa insidente sa pagpamusil sa Polomolok, South Cotabato niadtong Martes sa gabie.
Kini human nga nakabsan na sa kinabuhi samtang naa sa ospital ang usa sa mga biktima nga nailhan sa pangalan nga si Jade Silva.
Gikabutyag nga si S/Insp. Hernan Gabat, ang deputy chief of police sa Polomolok police station ang mao gayud ang punterya sa wala maila nga suspek og naangin lamang sa pagpamusil si Silva nga naigo ang ulo sa bala sa M16 rifle.
Nasayran nga giratratan sa suspek og armalite si Gabat nga niadtong higayuna mikaon si Silva sa Mang Ephoy Lechon House sa National Highway Brgy. Magsaysay.
Kagahapon sa kaadlawon dihang gidala sa Dr. Jorge P. Royeca Hospital dinhi sa syudad ang biktimang si Silva apan pasado alas 11:00 sa buntag nahunusan kini sa kinabuhi.
Kahibaluan nga gawas kay Gabat, patay usab ang kauban niining si Rio Salig Sr. og usa ka BFP personnel nga giilang si Carl Plomillo nga taga-CARAGA nga mikaon lang sa maong lechon house.
Samtang nagpabilin pa sa ospital silang Edgar Luzon nga usa ka BFP personnel, ang uban pang mga customer nga naangin lamang sa pagpamusil nga silang Riza Diamante, Relyn Pitogo, og Garizalde Villacora.
Kahibaluan nga 30 basiyo sa M16 rifle ang narekober sa crime scene.
