Misaka na sa 17 ang gidaghanon sa mga namatay tungod sa epekto sa Bagyong Inday o international name nga Bavi ug sa gipalig-on nga Habagat, sumala sa Office of Civil Defense o OCD.
Matod ni OCD Deputy Administrator Assistant Secretary Bernardo Rafaelito Alejandro IV, kadaghanan sa mga namatay gikan sa Malapatan, Sarangani, samtang lima ang naitala sa Lanao del Sur sa Bangsamoro Autonomous Region in Muslim Mindanao o BARMM, ug duha usab sa Bukidnon.
Gipasabot ni Alejandro nga kadaghanan sa mga namatay tungod sa mga pagdahili sa yuta nga nahitabo sa walay hunong ug kusog nga pag-ulan.
Padayon sa pagkakaron ang monitoring ug response operations sa OCD uban sa ubang ahensya sa gobyerno aron matabangan ang mga komunidad nga naapektuhan sa bagyo ug Habagat.
