GENSAN – Gipahayag ni Police Captain John Ricard Lim, deputy chief sa Pendatun Police Station sa General Santos City, nga kung dili kaya mamahihong ginikanan , mas maayong mogamit na lamang og contraceptives aron malikayan ang pagpangabuso ug paglabay sa inosenteng mga bata.
Kini ang iyang gibutyag human makaplagan ang usa ka fetus nga patay na sa miaging adlaw dinhi sa syudad. Matod pa ni Lim, usa kini ka makasusubo nga panghitabo nga nagpakita sa kawalay responsibilidad sa uban nga ginikanan.
Gipasabot usab sa opisyal nga adunay daghang pamaagi aron malikayan ang ingon ani nga sitwasyon, ug usa na niini ang husto nga family planning. Gidugang pa niya nga kinahanglan nga masabtan sa katawhan nga ang kinabuhi, bisan pa man sa sabakan pa lamang, adunay bili ug angay nga respetohon.
Nagpadayon karon ang imbestigasyon sa kapulisan aron masuta kinsa ang responsable sa paglabay sa fetus ug unsaon pagpasaka og kaso batok niini.
