GENERAL SANTOS CITY – Gipangbalik na sa mga employers sa Riyadh, Saudi Arabia, ang mga passport sa mga Oversees Filipino Workers ug uban pang mga langyaw nga trabahante sa kanilang lugar.
Kini ang gibutyag sa Bombo Radyo ni Mae Abulag, taga-Brgy Calumpang, GenSan, gatrabaho isip nurse sa usa ka military hospital sa Riyadh.
Gumikan matud pa ang naasoy’ng lakang sa gibati nga tumang kahadlok ug kabalaka sa mga nagpuyo sa lugar, human sa natigayong ballistic missile incident nga gikan sa Yemen.
Sumala pa nga nagtuo silang usa lamang ka kusog nga dalugdog ang ilang nadunggan nga makusog nga buto ug pagtay-og.
Apan mapasalamaton matud pa sila nga walay natala nga casualty sa insidente. Kahibaluan nga kasagaran ang mga employers ang maoy gahupot sa mga passports sa ilang mga langyaw nga empleyado.
Apan karon gimando na matud pa sa gobyerno sa Riyadh nga tugtan ang mga expat o expatriates nga buot nang mubiya sa Riyadh, Saudi Arabia, nga makauli sa ilang tagsa ka mga nasud.
Nasayran nga luyo nga naka-red alert tungod sa insidente, wala matud pay nanirado o nasuspinde nga trabaho o opisina.
