Gitugotan sa Pasig City Regional Trial Court Branch 159 ang mosyon ni Kingdom of Jesus Christ Apollo Quiboloy nga magpabilin sa ospital samtang nagpaayo tungod sa pneumonia.
Matod ni Atty. Israelito Torreon ang abogado ni Quiboloy, nga ginahulat pa nila ang findings sa ospital sa mga test kang Quiboloy kung hangtod kanus-a kini magpabilin sa tambalanan.
Itugyan na usab nila ang desisyon sa korte ingon man ang rekomendasyon sa iyang doktor kabahin sa pagpabilin niini sa ospital.
Gimando usab sa korte nga ibalhin na lamang si Quiboloy sa Pasig General Hospital gikan sa Medical City.
Gihingusgan pa ni Torreon nga ang hinungdan sa pagsakit ni Quiboloy tungod sa dili maayong ventilation sa Pasig City Jail ilabi na nga 74 anyos na ang kanhi lider sa KOJC.
Nag-atubang sa kasong human trafficking si Quiboloy sa Pasig City Trial Court og niadtong Enero 18 gidala na kini sa ospital human nga na-diagnosed nga may pneumonia.
