Gitawag sa Partido Demokratiko Pilipino (PDP) nga usa ka “political stunt” ang bag-ong kasong plunder nga gisang-at batok kang Vice President Sara Duterte sa Office of the Ombudsman.
Sumala sa pahayag sa PDP, klaro daw nga ang bag-ong reklamo usa lamang ka politically motivated nga lihok nga nagtinguha sa pagdaot sa dungog sa Bise Presidente ilabi na nga nagkadool ang panahon sa eleksyon.
Matod pa sa partido, wala daw lig-on nga basihan ang akusasyon sa plunder ug ubang kaso, ug ang paggamit sa isyu sa confidential funds aron pasakaan og reklamo giingon nilang gipupugos ug gilawgan og politika.
Bisan pa man, nagpadayon ang proseso sa Ombudsman sa pag-review sa mga reklamong gisang-at sa grupo sa mga pari ug civic leaders nga nag-akusar sa Bise Presidente sa sayop nga paggasto sa pondo sa iyang duha ka puwesto sa gobyerno.
Giinsistir sa PDP nga andam silang motabang sa legal nga depensa sa Bise Presidente ug nagdahom silang mapamatud-an unya nga pulong-pulong ra ang mga pasangil.
Sa karon, naghulat pa ang publiko sa aksyon sa Ombudsman kung unsay mosunod nga lakang sa kaso.
