GENSAN – Giklaro ni Joel Gavin, ang Airport Manager sa General Santos International Airport, nga normal ra nga adunay pipila ka mga indibidwal nga mohatag ug mga komentaryo kabahin sa bagong implementasyon sa parking fee sa sulod sa airport. Sumala ni Gavin, usa kini ka reaksyon nga ilang gitagad ug nasabtan.
Bisan pa niini, padayon ang ilang information dissemination aron masabtan sa publiko ang legal nga basihanan ug katuyuan sa bayrunon.
Gipasabot usab ni Gavin nga ang pagpangolekta sa parking fee dili lang sa Gensan Airport gipangbuhat, kundili sa tibuok nasud .
Gibase kini sa CAAP Memorandum Circular No. 019–2025 nga gi-isyu subay sa Republic Act No. 9497, nga nagtugot sa Civil Aviation Authority of the Philippines (CAAP) sa pag-regulate sa bayad sa paggamit sa mga pasilidad ug serbisyo sa mga tugpahanan.
Dugang pa ni Gavin, adunay mga exemption sa maong bayrunon, sama sa mga sakyanan sa gobyerno ug mga taxi, nga dili apil sa obligasyong magbayad og parking fee.
Kahinumduman nga sa unang adlaw sa implementasyon sa bayrunon, daghang pasahero ug motorista ang nialma tungod sa kamahal sa bayad ug kakuwang sa impormasyon kabahin sa regulasyon. Apan matod pa ni Gavin, kini ginapangusgan na nila karon pinaagi sa klarong impormasyon ug koordinasyon sa publiko, aron malikayan ang kasamok ug kalibog sa umaabot.
Ang pamunuan sa Gensan Airport naningkamot nga masiguro nga ang tanang lakang nga ilang gihimo makatabang sa pagpalambo sa serbisyo, seguridad, ug kahapsay sa operasyon sa paliparan.GE
