“Nagkaproblema tungod sa climate change ug basura nga unta magkat-on na ang mga tawo”.
Mao kini ang pahayag ni Pangulong Marcos atol sa iyang pagsuta sa kahimtang sa mga lugar nga nabahaan sa metro Manila.
Sumala pa niini nga dili na unta magpataka ug labay sa basura gumikan mao kini ang nagbara sa mga pump.
Gitumbok usab ni President Ferdinand “Bongbong” Marcos Jr. ang pagbag-o sa klima kon climate change nga maoy hinungdan sa dakong pagbaha niadtong Miyerkules dala sa kusog nga pag-ulan gumikan sa Habagat (Southwest Monsoon) nga mas gipalapad sa tropical cyclone Carina.
Sa iyang pamahayag human sa iyang ocular inspection sa mga apektadong lugar sa Metro Manila, gitumbok usab ni Marcos ang naguba nga navigation gate nga nadasmagan sa usa ka barko sa Navotas.
Kahinumduman nga niadtong Lunes lamang, nagbutyag si Pang. Marcos sa iyang ikatulo nga State of the Nation Address nga kapin sa 5,000 ka mga flood control projects ang nahuman na.
Human sa Super Typhoon Carina, daghang mga senador ang mipunting sa pagpatuman sa mga flood control projects nga gikaingon nila nga gigahinan og gatusan ka bilyon ka pesos ubos sa national budget matag tuig.
Gikuwestiyon nila kung unsa kaepektibo ang flood control measures ug sa paggamit sa annual budget nga gigahin alang sa maong mga proyekto.
Nasuta nga mokabat sa P255 bilyones ang gigahin alang sa flood control projects sa DPWH gikan sa P5.768-trilyon nga national budget sa 2024 nga mas dako kon itandi sa ubang kritikal usab nga sektor.
