Kasado na ang mahimong engkwentro tali sa Team Serbia og Team USA sa semifinals sa Paris Olympics 5X5 men’s basketball.
Kini ang ikaduhang panag-atubangay sa duha ka team karong Olympics human ang una nilang panag-atubang kaniadtong July 29 ilawom sa Group stage (Group C) kung asa gitambakan sa USA ang Serbian team, 110 – 84.
Subling mag-atubangay ang duha ka team nga pulos gibandera sa mga NBA stars og superstars nga gilangkoban sa duha ka 4-time NBA champion nga silang Lebron James og Stephen Curry sa US samtang silang three-time NBA MVP Nikola Jokic og Bogdan Bogdanovic sa Serbia.
Bag-o ang pagsabak sa semis, gitambakan una sa USA ang Team Brazil sa score nga 122 – 87.
Sa habig sa Serbia, natala niini ang usa sa pinakadakong comeback sa kasaysayan sa Olympics human bawion ang 24 points nga lamang sa Team Australia, 95-94.
Ang mudaog tali sa duha musulo sa gold medal round sa 5X5 men’s basketball.
Sa pikas bahin mag-atubangay usab sa Semis ang Team France og ang FIBA World Cup champion, Team Germany.
Nahimo sa Team France nga pildihon ang Team Canada pinaagi sa nindot nga performance sa twin tower niini nga silang Rudy Gobert og Victor Wembanyama.
Nahimo usab sa Team Germany nga pildihon si NBA Champion Giannis Antetokounmpo og ang team Greece.
