GENERAL SANTOS CITY – Gikalipay ni P/S/Insp. Richard Pabalinas, hepe sa Malungon Municipal Police Station sa Sarangani, ug igsuon sa namatay nga si S/Insp. Ryan Pabalinas, usa sa SAF fallen 44, ang balita nga pagpasang-at ug kasong kriminal kanilang kanhing Pangulong Benigno “Noynoy” Aquino III ug uban pa, kalabot sa natigayong maduguong Mamasapano incident.
Sumala pa nga isip igsuon ug pulis, gitugyan na lamang niya ang pag-imbestiga sa gituboy nga investigating body.
Ug luyo nga may mga nakita usab sila nga mga lapses sa nakalabay’ng administrasyon, malisod matud pang mang-alegar kon kinsa ang mga kinahanglang manubag.
Apan sa migawas nga resulta sa imbestigasyon, nalipay matud pa sila isip pamilya, hilabi pa nga handum gayud nilang makab-ot ang hustisya.
Dugang pa ni Pabalinas nga miubos gayud ang morale sa mga kapulisan kaniadto nga daw sa gibiyaan ug gipasagdan sa ere sa gobyerno ang mga ordinaryong pulis nga nakigbisog ug nagbuhis ug kinabuhi alang sa ilang misyon.
Apan tungod sa kasamtangang desisyon sa pagpasang-at ug kaso sa kanhing administrasyon, subli matud pang ma-boost ang morale sa kapulisan karon.
Dungan niini, nanghinaot silang S/Insp. Pabalinas nga dili lamang pangkondisyon ug pagpamulitika ug kutob sa pagpasang-at ug kaso inay mapanubag gayud ang kinsa mang sad-an.
Una niini, kahibaluan nga gipalig-on sa Office of the Ombudsman ang pagpasang-at ug kasong kriminal kang kanhing Pangulong Aquino kung asa lakip nga gikasuhan silang PNP chief Alan Purisima ug kanhing PNP-SAF commander Getulio Napeñas.
Kini gumikan sayop matud pa ni Aquino ang pagtugot nga mangilabot si kanhing PNP Chief Purisima sa operasyon sa Mamasapano luyo nga gipailawom sa preventive suspension.
