GENERAL SANTOS CITY – Positibo ang pamilya sa mga biktima sa Maguindanao massacre nga mahimong pabor kanila ang desisyon sa korte sa kaso. Kini dungan sa ika-siyam ka tuig nga anibersaryo sa nahisgutang mangilngig nga krimen kung asa sa 58 ka tawo ang biktima, 32 niini ang mga sakop sa media.
Kahibaluan nga sa unang quarter sa tuig sa 2019 matud pa gilauman nga magpagawas ug desisyon sa kaso ang korte.
Sa pahighinabi sa Bombo Radyo kang Monet Salaysay, asawa sa namatay nga journalist nga si Nap Salaysay, gibutyag niini nga nalipay sila sa nadunggan nga may kalambuan ang kaso.
Apan dungan niini, nadismaya usab matud pa sila sa kaso gumikan hilabihang kadugay ang dagan sa kaso nga naabtan na ug siyam ka tuig ug wala pa gihapon gipanaog nga desisyon, butang nga mas nagpadugay usab matud pa sa ilang pag-move on sa nahitabo.
Kini luyo nga tataw na sa mga ebidensya gawas pa nga usa lang ang ginatudlo sa mga witness, nga ang pamilya Ampatuan partikular na ang dating mayor ng Datu Unsay, Maguindanao na si Andal Ampatuan Jr., isip mastermind.
Dungan niini, gipasalamatan ni Salaysay ang mga sakop sa media sa padayon nga pagsubaybay sa kaso, gumikan kon dili matud pa, basin ug nalubong na usab ang kaso sama sa mga nahimong biktima.
Samtang, gihingusgan ni Salaysay, asawa sa namatay nga journalist nga si Nap Salaysay, nga kung may hustisya gayud sa nasud, angayan lamang ma-convict ang mga Ampatuan.
Dungan niini, gihingusgan usab niini nga wala gayud sila midawat ug salapi gikan sa mga akusado.
Kahibaluan nga miadto sa kauluhan si Salaysay aron muapil sa ipahigayon nga aktibidad alang sa ika-9 ka tuig nga anibersaryo sa Maguindanao massacre.
Nanawagan usab kini sa kinsa man matud pa nga may “final say” sa kaso, kon si Regional Trial Court Branch 221 Judge Jocelyn Solis-Reyes man, nga magdesisyon na ug ikombikto na ang mga tinuod ug tataw nga sad-an.
Samtang dinhi sa Gensan kung asa gilubong ang 12 sa mga miyembro sa media nga napatay sa masaker, may ipahigayon nga aktibidad nga matag tuig kini nga gihimo.
Ug gani, mubisita matud pa ang mga sakop sa Presidential Task Force on Media Security(PTFOMS) sa mass grave sa Maguindanao massacre victims sa Forest Lake Cemetery dinhi sa siyudad karong adlawa.
Kini sa pagpanguna ni Undersecretary Joel Sy Egco, Executive Director sa PTFOMS.
Makigpagdayalogo matud pa si Egco sa mga pamilya sa 12 ka journalists nga lakip sa napatay sa masaker.
