GENERAL SANTOS CITY – Sulayan sa mga kabanay sa mga biktima sa Mangilngig nga Maguindanao masaker nga ilang ipahonghong kang Pangulong Rodrigo Duterte pinaagi sa kanhi nila abogado nga karon Presidential Spokesperson Harry Roque aron mapadali ang dagan sa kaso.
Kini na lamang ang nakita nga paagi aron maangkon ang hustisya sa 58 ka mga biktima sa November 23, 2009 masaker sa Sitio Salman, Masalay, Ampatuan Maguindanao.
Matud kang Merly Perante asawa ni Ronnie Perante usa sa biktima sa Maguindanao masaker nga buntis siya kaniadto dihang mahitabo ang krimen ug ning tungura nag-edad na ug pito ka tuig ang iyang anak.
Gikumpirma niini nga kaniadto daghan ang mitunol sa ilang panabang apan niining panahuna wala na.
Gikadugang pa niini nga duha ka tuig nang walay update sa kaso gumikan walay kontak sa ilang abogado.
Kini human gikuha ni Toto Mangudadatu si Atty. Nena Santos samtang naglaum nga maapil sa ipakanaug nga desisyon.
