GENERAL SANTOS CITY – Mibalibad una sa paghatag ug pahayag ang pamilya sa Arnis instructor nga gipusil miaging semana, human kini nabakwian na sa kinabuhi kagahapong adlawa.
Kahibaluan nga ang biktima giilang si Silvano Bombales, 41-anyos, taga-Liloha, Brgy Lagao ning siyudad, kung asa sa pakighinabi sa Bombo Radyo sa pamilya niini, gikabutyag nga gibakwian kini sa kinabuhi gumikan sa naangkon nga multiple gunshot wounds sa lawas.
Una ng gibutyag sa Bombo Radyo ni Police Senior Inspector Lemuel Enrijo, hepe sa San Isidro Police Station, nga personal nga bangi ang gitutukan nilang anggulo sa insidente, ug may mga person of interest na sila may kalabutan sa posibleng namusil sa biktima, human kini nakuhaan ug pahayag sa kapulisan.
Gikabutyag usab nga posibleng gipunting ang ulo sa biktima dihang gipusil apan gumikan nagdagan ang motor hinungdan nga nadaplisan lamang ang dalunggan niini ug may laing igo sa likod.
Kahibaluan nga ang mga suspek matud pa ang sakay sa duha ka motor, ug migamit ug 9 mm pistol sa pagpusil sa biktima.
Sa karon nagpadayon ang imbestigasyon sa kapulisan kalabot sa nasampit nga pagpamusil, ug ginamonitor ang mga pangalan nga gisampit sa biktima, una kini nabakwian sa kinabuhi.
