GENERAL SANTOS CITY – Nagbangotan si Gina Romero sa pagpanaw sa iyang apo nga si Princess Arian Cabucos nga nakit-ang patay sa sagbutang bahin sa usa ka bakanteng luna sa Purok Malinawon, Barangay Conel ning syudad.
Matud niini, ang iyang mga silingan ang unang nakakita sa iyang apo nga gisulod sa sako og wala nay kinabuhi.
Iyang nakumpirma nga si Princess ang naa sa sako tungod sa sanina nga nakatuok sa iyahang liog.
Nagmahay ang nasampit nga iyang gibiyaan ang apo sa ilang balay tungod kay nangaligo sila.
Kampante kini nga anaa mutan-aw kay Princess ang uyuan og ninang apil ang nag-arkila sa ilang balay.
Nagtuo kini nga kaila sa apo ang nagdala kaniya tungod dili basta-basta mulakaw sa layo ang nasampit kung dili niya kaila ang kauban.
Saysay usab niini nga dali lang usab mahaylo ang iyang apo kung adunay ihatag kaniya.
Samtang, gikumpirma niini nga biktima sa pagpangabuso sa iyang amahan ang iyang apo.
Natigayon ang pagpangabuso sa bata niadtong 2023 kung asa pagkakaron wanted ang amahan niini nga si Jay-Ar Cabucos.
Samtang ang inahan sa maong bata ang nanarbaho sa kaulohan og may lain nang pamilya .
