Gitugyan na sa National Housing Authority (NHA) ang condominium unit nga nagkantidad og P2.266 milyon ngadto sa pamilya sa namatay nga student-athlete nga si Rene Clert “Bobet” Baterbonia, pipila ka semana human sa iyang pagpanaw.
Sumala sa Provincial Government of Agusan del Sur (PGAS), kapin duha ka dekada nga nagpuyo ang pamilya sa ilang yano nga ancestral home nga pirming mabahaan matag kusog nga ulan.
Tungod niini, napugos sila sa kanunay nga pagbakwit matag mosaka ang tubig sa ilang lugar.
Bisan pa sa ilang kahimtang, wala gayud mawagtangi og paglaom si Bobet nga sa umaabot makahatag siya og mas luwas ug mas maayong puluy-anan alang sa iyang pamilya.
Kanunay usab niyang gisaad kini sa iyang inahan.
Karon, bisan wala na siya, natuman ang usa sa iyang labing dakong damgo.
Gilauman nga ang maong condominium unit mahimong mas luwas ug mas lig-on nga puluy-anan alang sa pamilya Baterbonia human sa dugay nilang pagpuyo sa usa ka lugar nga pirming mabahaan.
Bisan dili gayud mapulihan sa bisan unsang materyal nga butang ang pagkawala sa usa ka minahal sa kinabuhi, matod sa PGAS nga ang maong tabang nagsimbolo sa pagpakabana ug panaghiusa sa komunidad isip pagpasidungog sa handumanan ni Bobet.
Padayon usab ang pag-abot sa suporta alang sa naulilang pamilya sa batan-ong atleta.
Bag-o lang, nakadawat si Rovelyn Baterbonia ug ang iyang mga anak og mga money bouquet gikan sa usa ka lokal nga flower shop sa Talacogon isip pagpahayag sa ilang pakikiramay ug suporta.
Nagpasalamat si Rovelyn sa maong flower shop, dili lamang tungod sa ilang gipadalang tabang, kondili usab sa padayon nilang paghinumdom sa iyang anak.
Matod kaniya, adlaw-adlaw nga nagabutang og preskong mga bulak sa lubnganan ni Bobet ang maong tindahan sukad gilubong siya niadtong Miyerkules, Hunyo 24.
Hinumdoman nga namatay si Bobet uban sa Nigerian national nga si Divine Adili niadtong Hunyo 8 human sila gituohang nalunod samtang nag-apil sa usa ka team-building activity.
