Pamilya ni Fr. Suganob, gikalipay nga buhi pa gihapon kini

GENERAL SANTOS CITY -Gikalipay sa pamilya ni Fr. Teresito “Chito” Suganob nga buhi pa kini hangtud karon samtang naa gihapon sa kamot sa Maute terror group didto sa Marawi City.

Sa eksklusibong pakighinabi sa Bombo Radyo, gibutyag sa igsuon nga si Mr. Boyet Suganob, hangtud karon wala silay komunikasyon kay Father chito human nga nabalitaan nga buhi og gihimong kusinero sa teroristang grupo.

Hinuon, giampo nila nga buhian sa dili madugay ang pari og maundang na ang kasamok sa Marawi.

Unang migawas ang report nga gilungguan og ulo si Fr. Chito nga hugot nga gikasubo sa iyang pamilya.

Apan nabuhi ang paglaum sa pamilya human nga gibutyag sa tropa sa gobyerno nga buhi gihapon si Father Chito.