GENERAL SANTOS CITY – Gapanawagan ang kampo sa pamilya sa gipatay nga flight attendant sa Makati City sa mga gitudlong suspek sa mangilngig nga krimen nga magpakita og dili magtago sa mga otoridad.
Gibutyag ni Atty. Jose Ledda III, miyembro sa legal counsel sa pamilya ni Christine Dacera, nga angayang magpakita ang laing walo ka mga at-large nga suspek aron makahatag sa ilang mga testimonya.
Sa pamahayag usab ni PCol. Harold Depositar, chief of police sa Makati PNP, gihulat na lamang nila ang proseso sa inquest proceedings og ang regular filing sa mga kaso batok sa walo pa ka mga at-large.
Base sa inisyal nga imbestigasyon, migawas nga posibleng gipainom og droga ang biktima og gilugos sa sulod sa usa ka lawak sa hotel sa Makati City.
Adunay samad sa lawas ang biktima og may mga bun-og.
Una niini gipasakaan og kasong rape with homicide ang mga natumbok nga mga suspek kung asa ang tulo nga nadakpan ang nailhan nga silang John Pascual Dela Serna III, 27; Rommel Daluro Galido, 29; og John Paul Reyes Halili.
Gihuptan na usab sa mga otoridad ang CCTV footage sa maong hotel.
