GENERAL SANTOS CITY – Hangtod sa ulahing mga higayon atol sa lubong ni Christine Angelica Dacera, 23 anyos nga flight attendant, gi-ampo sa pamilya Dacera nga makab-ot ang hustisya alang ilang mahal sa kinabuhi.
Kahibaluan nga nahimong emosyunal ang pamilya Dacera, mga mahal sa kinabuhi og mga higala atol sa ulahing kapahulayan ni Christine sa Forest Lake Cemetery sa Brgy Apopong ning dakbayan.
Sa ulahing mensahe ni Mrs. Sharon Dacera, nagpasalamat kini sa tanang tawo nga mitabang og mihatag og suporta sa ilang pamilya human ang nahitabo kang ” Ica” nga kung kahinumduman, nakit-an na lang nga wala nay kinabuhi human sa ilang New Years Party sa usa ka hotel sa Makati City.
Miapela si Mrs. Dacera og padayon nga pag-ampo alang kang Christine nga atua na matud pa sa langit og sa padayon nila nga pakigbatok aron makab-ot ang hustisya para sa iyang anak.
Mibuhos ang sobrang emosyon ni Mrs. Dacera dihang gibalikan niya ang pangandoy ni Christine sa kinabuhi nga ma-tour ang iyang pamilya sa tibuok kalibutan. . Giampo ni Mrs. Dacera sa Ginoo nga padayong giyahan ang ilang pamilya samtang magpadayon ang imbestigasyon sa nahitabo kang Christine.
