GENERAL SANTOS CITY – Gihingusgan ni Joremae Balmediano, tigpamaba sa Office of Civil Defense Region 12, nga aron makapangandam sa mga muabot nga katalagman importante nga adunay mga paunang lakang nga himoon ang usa ka pamilya sa ilang panimalay.
Dili matod pa ihatag sa gobyerno ang tanang responsibilidad aron masiguro ang kaluwasan.
Gibutyag sa opisyal nga kinahanglan responsable usab ang tanan isip katawhan rason nga dapat masayod ang usa ka pamilya kung taas ang risgo nga maigo sa mga pagbaha ug pagdahili sa yuta ang nahimutangan sa ilang panimalay.
Iya usab gipunto kung unsa kamahinungdanon ang pagmugna ug “disaster family plan”. Buot pasabot, ang usa ka pamilya kinahanglan kabalo kung asa muadto panahon sa katalagman, kabalo kung asa ang mga evacuation centers, kinsa ang angay nga duolan, unsa na mga gamit ang angay nga dal-on aron dali lang nga makahawa sa apektado nga lugar.
Angayan usab nga nakalista kon naka-save ang mga emergency hotlines kon numero sa mga kabanay ug ahensya nga pwede i-contact kung kinahanglan ug rescue.
