Nakadaog ang pambato sa Pilipinas nga si Kirk Bondad sa titulo sa Mister International 2025.
Gipildi sa Filipino-German model ug fitness trainer ang 40 ka mga kandidato gikan sa lain-laing nasod sa pageant nga gipahigayon sa Bangkok, Thailand.
Si Saadedine Hneineh sa Lebanon maoy napiling first runner-up samtang si Choi Seung Ho sa South Korea maoy second runner-up.
Nakadayeg si Kirk sa mga judges dihang gipangutana siya kon hatagan ba siya og kahigayonan nga makaistorya sa United Nations ug miingon nga iyang tutokan ang mga bata nga angay panalipdan ug hatagan og higayon.
Gawas sa award, nakasulod usab siya sa top 5 sa National Costume Competition ug Top 3 sa People’s Choice Contest.
Kaniadtong 2024, miapil usab siya sa Mr. World 2024 diin nasulod siya sa top 20.
