GENERAL SANTOS CITY – Feeling celebrity.
Kini ang gibati sa pambato sa General Santos City sa Bombo Music Festival 2017 nga sila si Mohammad Harris Tin, ang composer sa kanta nga “Sobra” ug Aleve Navaira nga mao ang interpreter o mukanta sa naasoy’ng kanta.
Sa pakighinabi ni Bombo Janjan Macailing, station manager sa Bombo GenSan nga atua usab sa Iloilo alayon sa nagapdayon nga TLMC, gipadayag nilang Harris ug Navaira ang ilang pagdayeg sa pag-akomodar kanila sa Bombo Radyo, hilabi na pag-abot nila mismo sa airport sa Iloilo City kung asa sama sa celebrity, gisugat sa usa ka pribadong van ug gidiretso sa kaugalingong sosyal nga hotel.
Sumala pa nga ‘first time’ sa tibuok nilang kinabuhi ang susamang kasinatian. Nakadayeg usab matud pa sila sa preparasyon sa organizers hilabi na sa venue sa grand performance night sa Rose Memorial Hall sa Central Philippine University (CPU), nga daw sa pang mga bigatin nga mga artista.
Kini gawas pa sa state of the art lighting and audio equipment, ug may LED Wall. Samtang, giangkon usab nilang Harris ug Aleve nga gikulbaan sila, hilabi na nga gawas pa nga duyugan sa orchestra ang tanang mga magperform.
Bisan paman, gitambagan ug gigiyahan matud pa sila sa direktor, hinungdan nga naawhag matud pa si Aleve nga mas paninduton pa ang iyang performance pag-abot sa finals night.
Samtang, na-starstruck matud pa silang Mohammad Harris Tin ug Aleve Navaira, dihang nasayran ang mga judges sa umaabot nga Grand Performance Night sa Bombo Music Festival.
Matud ni Aleve, na-shock sila dihang gianunsyo sa Bombo Iloilo nga usa sa mga mamahimong hurado mao ang ilang idolo nga si Aiza Seguerra, ug si Jay Durias sa South Border, ug uban pa.
Samtang, malipayon matud pa sila nga dali nilang nakasuod ang ilang mga makaatbang nga gikan sa nagkalain-laing lugar sa nasud, dungan sa rehearsals.
Dungan niini, giawhag usab niini ang ilang mga fans, kabanay, mga higala ug suking-tigpaminaw sa Bombo Radyo nga ipadayon ang pagboto kanila pinaagi sa online ug text votes, alang sa mas dakong tsansa sa kadaugan.
Sa pagkakaron nagpadayon ang hugot nga rehearsals, kung asa ning adlawa gilaumang mahimong mas hugot ug maduguon aron mapaniguro nga mamahimong ‘the best’ ang tibuok performances.
Matigayon ang Grand Performance Night sa Bombo Music Festival ugmang adlawa, Sabado, Enero 6, alas-7:00 sa gabii, sa nasampit nga venue, didto sa Jaro, Iloilo City.
Live usab kining mapaminawan sa 801KHz Bombo GenSan, ug sa live streaming sa Bombo Radyo website, sa www.bomboradyo.com.
