Gikoronahan isip Miss World Philippines 2024 si Krishnah Marie Gravidez gikan sa Baguio City. Si Gravidez maoy nag-una sa 32 ka mga kandidata sa coronation night nga gipahigayon sa Mall of Asia Arena kagabii, Biyernes, Hulyo 19, 2024.
Gawas sa maong titulo, nakadaog usab kinig Best in Evening Gown, Best in Swimsuit, Miss Skin ni Cathy Valencia, Miss Photogenic, Miss Hello Glow, Miss Procap ug Miss Dr. Leo awards.
Si Jasmine Omay sa Tarlac maoy midaog sa Miss World Philippines 2024 1st Princess title; samtang si Sophia Bianca Santos sa Pampanga maoy Miss World Philippines 2024 2nd Princess.
Si Dia Maté sa Cavite ang gikoronahan nga Miss Reina Hispanoamericana Filipinas 2024 samtang si Patricia Bianca Tapia sa Batangas maoy Miss Philippines Tourism 2024. Si Nikki Buenafe nga taga-Probinsya sa Pangasinan maoy midaog sa Miss Multinational Philippines 2024 title ug Jeanne Isabelle Bilasano sa Bicol Region ang Face of Beauty Philippines 2024.
Si Billy Crawford maoy nag-host sa coronation night kauban si Universal Woman 2024 Maria Gigante, Teejay Marquez ug Reina Hispanoamericana Filipinas 2021 Emmanuelle Vera.
Ang kasamtangang Miss World nga si Krystyna Pyszková sa Czechia maoy mihatag sa Rays of Hope crown ngadto kang Krishnah samtang si Miss World Philippines 2022/2023 Gwendolyne Fourniol ang mipasa sa sash.
