Malipayon nga gipaambit ni Police Col. Ireneo Dalogdog, ang City Director sa Cebu City Police Office nga nagmalampuson ang opening ceremony sa Palarong Pambansa 2024 nga gipahigayon sa Cebu City Sports Center, gahapon, Hulyo 9, 2024.
Matud ni Police Col. Dalogdog, nga adunay gibana-bana nga 20,000 ka mga tawo ang anaa sulod sa Cebu City Sports Complex nga misaksi ug misalmot sa opisyal nga pag-abli sa National Sporting event.
Ingon man nga mokabat sa 600 ngadto sa 700 ka mga Philippine National Police Personnel ang gipakatap aron sa pagbantay sa matag iskina nga maagian sa mga contingent atol sa gipahigayon nga parada.
Gawas sa mga kapulisan sa dakbayan sa Sugbo, anaa usab ang ilang mga partner agencies nga nisusi ug ni-abag sa pagsiguro sa seguridad sa lugar sa wala pa ang pag-abot sa mga VIP ug nasudnong kagamhanan aron mosalmot sa maong aktibidad.
Sa laing bahin, gihatagan og gibug-aton ni Presidente Ferdinand Marcos Jr., nga ang usa ka semana nga kompetisyon magsilbi dili lamang sa pagpakita sa pisikal ug mental nga kalig-on sa mga atleta kon dili sa pagrepresentar sa kusog sa matag Pilipino.
