Gipahibalo ni President Ferdinand Marcos Jr. nga migahin ug pundo ang gobyerno alang sa pagpatuman sa mas gipalapdan nga career progression system sa mga magtutudlo sa pampublikong eskwelahan.
Sa iyang pakigpulong atol sa iyang ikatulo nga State of the Nation Address, nagbutyag kini nga ang sistema magpasiugda sa propesyonal nga kalamboan ug pag-uswag sa karera sa mga pampublikong magtutudlo.
Sa maong sistema, mapaspasan mamtud pa ang pag-uswag sa karera sa mga magtutudlo ug wala’y magtutudlo nga magretiro sa ranggo nga teacher 1 lamang.
Ubos usab sa sistema, ang mga magtutudlo mahimong mopili sa pagpadayon sa pagtudlo o sa pagdumala sa eskwelahan.
Gipasalig niya nga ang duha ka mga track adunay daghang mga oportunidad sa pagtubo sa karera.
Gipunting usab niini ang learning recovery program sa nasud nga kinahanglan nga ipadayon sa labing dali nga panahon, sa pagkutlo sa bag-ong mga pagtuon nga nagpakita nga kapin sa katunga sa mga estudyante sa grade 6, 10, ug 12 ang napakyas sa pagkab-ot sa angay nga lebel sa kahanas ug ubos ang marka sa information literacy, problem solving, ug mga kahanas sa critical thinking.
Gawas sa pagsulbad sa kal-ang sa classroom, kinahanglan usab nga sulbaron ug tutukan ang digital gap. Kahinumdoman nga una ng gibutyag sa mga magbabalaod nga usa sa labing mahinungdanon nga tutukan sa administrasyon ni Pangulong Marcos Jr. mao ang systema sa edukasyon sa nasud.
