GENERAL SANTOS CITY – “Good choice” alang kang Atty Rogelio Garcia ang pagtuboy ni Pangulong Rodrigo Duterte kang Gen. Roy Cimatu isip bag-ong kalihim sa Department of Environment and Natural Resources kon DENR.
Isip personal nga kaila human kini na-assign kaniadto dinh, gibutyag ni Atty Garcia nga luyo nga dili ingon ka eksperto si Cimatu sa pagdumala sa naasoy’ng ahensya ug wala kaayoy background, apan gumikan sa maayo niining recod ug batasan ug katakos sa kanhing mga posisyon nga gihatag kaniya kaniadto, dako ang pagtuo ni Atty Garcia nga makaya sa heneral ang bag-ong katungdanan.
May panahon usab matud pa kini aron matun-an ang mamahimo niyang function.
Gikabutyag pa nga walay mahimo si Gen. Cimatu gumikan siya ang gipili sa pangulo, apan lauman matud pa nga mamahimong maayo usab ang performance niini.
Samtang, kalabot sa pagkabasura sa kumpirmasyon ni Gina Lopez sa Commission on Appointments, alang kang Atty Garcia, si Gina ang wala nag-comply sa due process sa gihimong pinakalit nga pagpasirado ug pagsuspenso sa mga permit sa daghang mga mining companies.
Sumala pa nga ang adbokasiya sa usa ka tawo dili angayang dal-on sa pagdumala sa usa ka ahensya inay ikonsidera usab ug mahimong able sa mga concerns sa mga negosyante, stakeholders ug uba pa, aron makakab-ot ug labing maayong desisyon ug patakaran.
