Target sa Bureau of Customs nga magpahigayon og “competitive” apan transparent nga subasta sa mga luhong sakyanan sa mga Discaya karong Nobiyembre 15.
Matod ni Customs Commissioner Ariel Nepomuceno, ang minimum nga madawat sa gobiyerno gikan sa bidding proceeds posibleng labing menos P200 milyones ngadto sa P220 milyones.
Kahinumduman nga sa 30 ka mga luhong sakyanan sa mga Discaya, 13 ang na-isyuhan og warrant of seizures ug detention tungod sa kakuwang niini sa tukmang mga dokumento sama sa import entry o certificate of payment. Samtang 17 ang nadiskubrehan nga adunay import entry ug certificate of payment apan gimandoan nga mopailawom sa post-clearance audit.
Samtang, isip kabahin sa nagpadayong reporma, ang Customs nisumite na og report ngadto sa Independent Commission for Infrastructure (ICI) nga nagrekomendar sa pagpasaka og mga reklamo batok sa kapin sa napulo ka mga empleyado.
Una nang nipasaka og imbestigasyon ang BOC kalabot sa posibleng kalambigitan sa kaugalingon nilang mga personnel sa kaso sa mga luhong sakyanan sa mga Discaya human sila maka-agi sa Customs nga walay saktong dokumento.
Ang 10 ka personnel nga gi-tag isip persons of interest gi-assign sa mga pantalan diin gi-import ang mga luxury cars, apil na ang mga padulong sa Batangas, Cebu, Manila ug Manila International Container Port.
