Nakatutok karon ang aktres nga si Gretchen Barretto sa pagpabalik sa iyang dungog nga nadungisan sa mga gibutyag sa whistleblower nga si Julie Patidongan alyas Totoy.
Matod sa abogado sa aktres nga si Atty. Alma Mallonga, ang pagpasaka og reklamo batok kang alyas Totoy nga naglambigit kang Gretchen sa kaso sa pagkawala sa mga sabungero dili makatabang karong panahona.
Matud pa ni Atty. Mallonga nga nasubo ang aktres sa nahitabo ug dili na makatabang karon ang pagpasaka og kaso tungod kay gihukman na siya sa mga tawo. Busa, ang abogado sa aktres nanawagan sa publiko nga ampingan ang isyu.
Matud usab ni Mallonga nga walay ebidensiya si alyas Totoy gawas sa mga pamahayag nga iyang gihulagway nga pantasya, imbensyon ug walay kahulogan. Matod pa niya nga si alyas Totoy wa mopirma og affidavit.
Hinuon, wala gisalikway sa aktres nga pasakaan unya og mas bug-at nga kaso ug usa na niini ang gikonsidera ang posibleng pagpasaka og kasong perjury, nga usa ka bug-at nga silot nga kon makonbikto, asa dili apil sa probation.
Kahinumduman nga una nang gipasanginlan ni alyas Totoy si Gretchen Barretto nga usa ka “alpha member” sa Pitmaster Group ug adunay kahibalo sa tanan nga nahitabo lakip na ang pagdagit sa mga missing sabangeros.
Hinuon, giklaro dayon sa aktres nga investor lang siya sa Pitmaster Group ug walay kahibalo sa pagkawala sa mga sabungero.
