Mopadayon ang pagsaka sa presyo sa mga produktong petrolyo sa nasud sa sunod semana tungod sa nagkataas nga presyo sa lana sa kalibotanong merkado, nga gipalihok sa nagpadayon nga tensyon sa Middle East.
Base sa unang tulo ka adlaw sa trading sa Mean of Platts Singapore, gilauman ang pagsaka sa presyo sa diesel og P4.70 kada litro, gasolina og P4.90 kada litro, ug kerosene og P3.30 kada litro. Gilauman usab nga mosaka pa kini sa kataposang duha ka adlaw sa trading kon dili mohinay ang kagubot sa rehiyon.
Posible nga molapas sa P5 kada litro ang sunod nga price adjustment, nga mahimong mosaka ang diesel sa P90 kada litro ug ang gasolina sa kapin P80 kada litro.
Kon mograbe pa ang panagbangi sa Middle East sa mosunod nga mga semana, posible usab nga moabot sa P100 kada litro ang presyo sa diesel.
Usa sa mga hinungdan sa pagsaka sa presyo mao ang nagpadayon nga panagsangka tali sa Estados Unidos ug Iran, lakip na ang pag-atake sa duha ka oil tanker sa Saudi Arabia sa Red Sea.
Tungod niini, misaka usab ang presyo sa Brent crude ug West Texas Intermediate sa kalibotanong merkado.
