GENERAL SANTOS CITY – May gitutukan nang anggulo ang kapulisan kalabot sa pagpusil-patay sa admin aide sa Commission on Higher Education Region kon CHED-12 nga si Jennifer Oñas, sa regional center sa Barangay Carpenter Hill, AH26, Koronadal City, South Cotabato miaging adlaw.
Kini human nga giangkon mismo ni CHED-12 Regional Director Maximo Aljibe nga may nadiskubrehan nga kahiwian ang biktima sa records section sa komisyon.
Nasayran nga ang biktima ang maoy sinaligan ug naghupot sa mga records sa tanang mga kolehiyo ug unibersidad sa tibuok rehiyon.
Hinungdan nga si Oñas ang maoy gatuki sa mga gisumite nga mga papeles sa tanang institusyon sa rehiyon, aron iberipika ug i-authenticate ang mga diplomas, transcripts ug uban pa.
Hinungdan nga kumbinsido si Dir. Albije nga may kalabutan sa trabaho ang pagpatay kang Oñas, gumikan posibleng may nasilip kini sama sa mga peke nga school records sa pipila ka kolehiyo sa Rehiyon 12, nga gisumite sa pipila ka mga opisyal ug empleyado sa gobyerno.
