GENERAL SANTOS CITY – Gikontra karon sa pipila ka konsehal ning dakbayan, ang kalabot sa pagpatukod sa City Museum, lakip ang lokasyon niini.
Kahinumduman nga didto kini planong ipatukod sa karaang city hall nga gikabutyag nga gipatukod kaniadtong 1949, kung asa gisugdan na ang konstruksyon apan kasamtangang naka-ung-ong.
Usa sa mga gidiskusyunan ang kalabot sa pagpabilin sa facade atubangan nga bahin sa karaang city hall aron i-incorporate sa ipatukod nga bag-ong gambalay, kung asa g ikabutyag nga dili maayo ug dili luwas nga ipabilin gumikan huyang na, base na usab sa pahayag sa mga structural analyst gikan sa City Engineers Office.
Kahibaluan nga ang mga gambalay nga 50 ka tuig na sukad napatukod sama sa gibungkag nga old city hall, ang gikonsiderang historical cultural heritage.
Apan base matud pa sa gihimong pagduki-duki, nasuta matud pa base sa mga dokumento ug papeles nga dili 1949 inay 1968 gikapatukod ang naasoy’ng gambalay.
Gawas niini, gidiskusyunan usab ang mas maayong lokasyon nga patukuran sa city museum, kung asa nagkausa silang Kag. Rosalita Nuñwz ug Franklin Gacal.
Apan mialma usab si Vice Mayor Shirlyn Nograles ug gikwestiyon nganong karon lamang gipagawas ang mga susamang concerns, luyo nga 2011 pa namugna ang maong ordinansa nga una nang giaprubahan ug giuyunan kaniadto sa konseho.
