GENERAL SANTOS CITY- Posibleng may basehan ang ginaplanuhan karon nga pagpasang-at ug impeachment complaint batok kang Bise Presidente Leni Robredo.
Kini ang panglantaw ni Atty Rogelio “Bic-Bic” Garcia, inilang abugado sa Rehiyon 12.
Sumala pa nga posibleng gilantaw sa pipila ka magbabalaod sa Kamara nga may paglapas sa konstitusyon, betrayal of public trust, pagpasagad sa pasangil ug alegasyon sa presidente ug panggobyreno sa Pilipinas nga iyaha pang gipadangat sa United Nation, ang gihimo sa ikaduhang pangulo, hilabi na pinaagi sa gipagawas nga pahayag luyo nga walay paigo nga ebidensya.
Matud pa nga may basehan kon rason nga pasakaan ug impeachment complaint, gumikan klaro ug tataw sa gipadala niya nga video clip didto sa UN, kung asa iyang gisaway ug gibasol ang mga isyu ug kontrobersya sa nasud sama sa isyu sa extra-judicial killings ngadto kang Pangulong Duterte, luyo nga wala pa napamatud-an.
Hinuon, depende na matud pa kini sa pagpasang-at ug impeachment complaint, kon aduna bay validity, sufficient in form and substance kon adunay indibidwal nga magpasang-at inubanan sa usa ka kongresista nga magsilbing endorser.
Gatuo usab si Atty Garcia nga dili pagpanimalos ang pagpasang-at ug impeachment complaint kang VP Robredo human nga unang gipasakaan niini si Pangulong Duterte, inay may basehan gayud.
Apan dili matud pa malimod nga may sagul gayud kining pulitika, hilabi na nga ang isyu sa impeachment proceedings mismo ang “political in nature”.
