Nagtuo ang Malacañang nga kabahin sa estratehiya sa House prosecution ang pagpasaka sa kontrobersyal nga si “Mary Grace Piattos” isip saksi sa impeachment trial.
Kini ang reaksyon sa Palasyo human gikumpirma ni House prosecutor ug Manila Rep. Joel Chua nga apil si Piattos sa 25 ka mga testigo nga ipatawag nila sa impeachment trial ni Bise Presidente Sara Duterte, ilabi na may kalabotan sa isyu sa confidential funds.
Matod ni Palace Press Officer Undersecretary Claire Castro, ang prosekusyon ang adunay katungod sa pagpili kung kinsa ang ilang ipresentar nga mga testigo sa kaso.
Giingon ni Castro nga kabahin kini sa estratehiya sa prosekusyon. Apan iyang gihisgutan nga base sa datos sa Philippine Statistics Authority (PSA), walay rekord sa ngalan nga “Mary Grace Piattos,” busa posible nga maglisod sila sa pagpangita kung kinsa gyud ang maong indibidwal.
Samtang, gihagit ni House prosecutor ug Manila 3rd District Rep. Joel Chua ang kampo ni Bise Presidente Sara Duterte nga ipakita si “Mary Grace Piattos” sa impeachment trial aron masulbad ang kontrobersiya may kalabotan sa giingong paggamit sa confidential funds.
Matod ni Chua, nagpabilin si Mary Grace Piattos sa listahan sa mga testigo sa prosekusyon tungod giisip nila kini nga importante nga saksi sa maong isyu.
Iyang giingon nga kung adunay motungha nga maong tawo, mahimo kini ipaagi sa cross-examination. Apan kung walay motungha, mas molig-on lamang ang pagduda nga dili tinuod ang maong identidad.
Gipasiugda ni Chua nga migawas ang ngalan ni Mary Grace Piattos sa mga acknowledgment receipt nga gigamit sa liquidation sa confidential funds sa Office of the Vice President.
Dugang niya, kung ang ngalan usa lamang ka code name, kinahanglan ipadayag sa depensa ang tinuod nga identidad sa tawo nga anaa sa luyo niini aron masulbad ang isyu.
