GENERAL SANTOS CITY – Hugtanong gikondena sa militar ang gihimong pagpanunog sa mga sakop sa New People’s Army sa usa ka unit sa Yellow Bus Line sa Brgy san Vicente, Makilala, North Cotabato.
Matud kang Lt. Silver Bilbes, tigpamaba sa 39th Infantry Battalion Philippine Army, kini gumikan bag-uhay lamang gianunsyo ang pagpadayon sa hinabing pangkalinaw tali sa gobyerno ug NPA.
Sumala pa nga kon maghisgut ug peacetalks, kinahanglang apil sa aksyon ug dili pulos istorya lamang, ug barugan ang ilang ginaduso kon ugaling sinsero sila alang sa hingpit nga kalinaw.
Kahinumduman nga natigayon ang insidente alas-9:00 kagahapon sa buntag, kung asa ang naasoy’ng bus nga may body number 1888 ang may sakay nga 30 ka mga pasahero, ug gabiyahe unta gikan Tacurong paingon sa Davao.
Sumala pa nga kalit nga may misakay nga duha ka lalaki, kung asa pag-abot sa unahan laing tulo ang misakay.
Gikabutyag nga armado ang nasampit nga mga suspetsado ug tig-usa ka caliber 45 pistol, ug gitiunan ang driver, dungan sa pagsinggit nga dili angayang mabalaka gumikan mga NPA sila.
Nasayran nga pag-abot sa usa ka lugar sa Brgy. Bagong Silang, 5- metros gikan sa national highway, gipahunong ang bus kung asa may nag-atang ang giandam na nga upat ka galon sa gasolina.
Diha-diha, human gipanaog ang mga pasahero, gilayon matud pang gisunog sa mga suspek ang bus.
Luyo nga wala gipasakitan, nakabati matud pa ug trauma ang driver nga maoy gitiunan ug pusil, ug ang mga pasahero hilabi na nga daghan kanila ang namroblema gumikan nawad-an na’g pamasahe, ug maayo na lamang nga gitabangan sa mga residente sa lugar.
