Nagsugod na ang pagpangandam alang sa ikaupat nga State of the Nation Address (SONA) ni Presidente Ferdinand Marcos Jr.
Sa pakighinabi sa media, si House Secretary General Reginald Velasco mikompirmar nga ang mga opisyal gikan sa House of Representatives, Senate, Office of the President, ug mga ahensya sama sa Philippine National Police, Armed Forces of the Philippines, Metropolitan Manila Development Authority, Department of Foreign Affairs, ug uban pa ang nagtagbo aron hisgutan ang umaabot nga SONA.
Matod ni Velasco, ang ihap sa mga imbitado mahimong mokabat sa 2,000 sama sa SONA 2024.
Ang opisyal sa Kamara nagkanayon nga gisugdan na usab nila ang pagplano sa mga pagpangandam sa seguridad aron masiguro nga hapsay kini.
Pipila ka oras sa wala pa ang SONA, si Velasco niingon nga usa ka bag-ong set sa House officers ang pilion sa pagbukas sa 20th Congress karong Hulyo 28.
