GENERAL SANTOS- Hugot nga giimbestigahan sa kapulisan ang natigayong pagpamusil patay sa duha ka lalaki sa Marcos Avenue, Highway, Brgy. Apopong General Santos City.
Ang mga biktima mao silang Agustin Navarrete Gonzales ug Ramonito Evangelista.
Matud pa kang PMajor Dennis Yuson, hepe sa Makar Police Station nga unang gipusil si Evangelista sa ulo og likod nga bahin resulta sa pagkahulog niini gikan sa gisakyang motorsiklo nga miresulta sa iyang hinanaling kamatayon.
Samtang padayon nga gigukod sa mga suspetsado ang nagmaneho sa motorsiklo nga si Gonzales kung asa naabtan kini ug gipusil sa lain-laing parte sa iyang lawas.
Gidala pa kini sa balay tambalanan apan gideklarang dead on arrival.
Base usab sa kapulisan nga napriso na kaniadto si Gonzales tungod sa kaso sa ginadili nga droga samtang si Evangelista ang dili pa lang dugay nga nakagawas sa City Reformatory Center.
Gibutyag nga miadto si Gonzales sa City Reformatory Center aron sugaton si Evangelista apan pag-abot nila sa Marcos Highway, Brgy. Apopong kalit silang gipaulanan ug bala.
Narekober sa crime scene ang 17 ka mga basiyo sa bala nga gikan sa caliber 45 ug 9mm pistol.
Sa karon, ginasubay na sa kapulisan kung asa gikan ang P11,000 cash nga narekober kang Evangelista nga gikan man kini sa presohan.
