Naghinaut si Councilor Franklin Gacal nga sa umaabot adunay mamahimong banggiitang tennis player nga gikan sa General Santos City ug makadala og dungog sa dakbayan sa mga nasyonal ug internasyonal nga kompetisyon.
Busa, giawhag niini ang kabatan-onan, ilabina ang adunay interes ug talento sa tennis, nga padayon nga bansayon ang ilang abilidad. Matud pa niya, anaa na karon ang tennis court sa dakbayan nga mahimong gamiton sa mga gustong magpraktis ug mas mapalambo ang ilang kahibalo sa maong dula.
Gipasabot usab ni Gacal nga pinaagi sa husto nga pagbansay, dedikasyon ug suporta sa lokal nga panggamhanan, adunay dakong posibilidad nga adunay motungha nga world-class tennis player gikan sa GenSan.
Samtang nagpadayon ang mga programa alang sa pagpalambo sa sports sa siyudad, naglaom ang konsehal nga mas daghan pang kabatan-onan ang maengganyo sa pag-apil sa tennis ug uban pang mga kalihokan sa sports aron malikayan usab ang pag-apil sa mga bisyo ug mahimong inspirasyon sa umaabot nga henerasyon.
