GENSAN- Nahimong tensiyonado ang sitwasyon sa sulod sa Central Public Market human gihangyo sa mga otoridad ang mga vendor nga nagpwesto sa Phase A, diin nahimutang ang fish ug seafood section, nga bakantehon ang ilang mga pwesto.
Kini human sa assessment nga gihimo sa City Engineering Office nga nagpakita nga dili na luwas gamiton ang maong bahin sa merkado tungod sa mga kadaot nga naangkon sa building human sa magnitude 7.8 nga linog nga miigo sa siyudad.
Sumala sa City Engineering Office, adunay mga structural damage nga namatikdan sa maong pasilidad nga mahimong magbutang sa peligro sa mga vendor ug konsumidor nga mosulod sa lugar.
Tungod niini, gihangyo sa mga otoridad ang mga vendor nga makigtambayayong sa mga lakang nga gipatuman sa lokal nga panggamhanan aron masiguro ang kaluwasan sa tanan samtang nagpadayon ang dugang nga inspeksyon ug teknikal nga ebalwasyon sa mga engineer.
Sa pagkakaron, nagpadayon ang koordinasyon tali sa Public Market Office, City Engineering Office ug mga vendor aron mapangitaan og angay nga solusyon ang sitwasyon ug mahatagan og temporaryong alternatibong pwesto ang mga apektadong negosyante.
Gipasiugda sa mga otoridad nga ang kaluwasan sa publiko maoy ilang nag-unang prayoridad samtang nagpadayon ang rehabilitasyon ug pag-assess sa mga pasilidad nga naapektuhan sa linog.
