GENERAL SANTOS CITY- Gihatagan lamang ug napulo ka adlaw ni CSU Head Danilo Ferrer ang iyang mga imbestigador aron makasumite ug resulta sa gipahigayon nga imbestigasyon kalabutan sa ligid nga gipagawas matud pa sa compound sa City Engineers Office.
Matud ni Ferrer nga dili na padugayon ang gihimo nga pagsusi luyo nga nakapagawas na ug pahayag ang buhatan sa City Engineers nga walay karga nga ligid ang sakyanan dihang migawas sa compound.
Human matud pa sa imbestigasyon, gilayon nga ipasa ni Ferrer sa buhatan ni Mayor Ronnel Rivera aron muhimo ug legal nga action.
Pagbutyag pa sa opisyal nga karong adlawa nanguha ug impormasyon ang iyang mga imbestigador sa City Engineers Office kung may ligid ba nga gipalit.
Mao usab ang pagsusi nga himuon sa General Services Office aron sayron kung mipalit ug ligid alang sa mga dumptruck.
Gipasalig pa ni Ferrer nga mahatagan ug kalamdagan ang naasoy nga isyu inig gawas unya sa resulta.
Kahinumduman nga gikataho ni CSU Officer Rey Orodio nga nagpagawas ug mga ligid sa City Engineering Compound ang driver nga si Antonio Provido samtang karga kini sa usa ka sakyanan nga walay trip ticket.
Gani paspas kaayo matud pa ang sakyanan dihang migawas sa lugar.
