GENERAL SANTOS CITY – Usa ka dakong kadungganan ang pagkuha sa upat ka Gensan boxers isip sparring partners sa WBA Super World Super Bantamweight champion ug Cuban boxer nga si Guillermo Rigondeaux.
Kini ang gibutyag ni Arnel Antiporda sa Association of Boxing Alliances in the Philippines Inc. (ABAP), sa eksklusibong pakighinabi sa Bombo Radyo.
Kahibaluan nga ang nasampit nga mga Gensan boxers mao silang WBC Asia superbantamweight king Reymart Gaballo, WBF International bantamweight champion Mike Plania, WBC Asia featherweight champion John Vincent Moralde, ug WBF World super featherweight champion Harmonito Dela Torre nga pulos mga undefeated ug ilawom sa pagdumala sa Sanman Boxing Gym.
Dungan kini sa pagpangandam ni Rigondeaux sa gikatakdang away sa unbeaten fighter nga si Moises Flores sa umaabot nga June 17 sa Mandalay Bay Casino and Events Center sa Las Vegas, Nevada.
Matud kang Antiporda, nagpakita lamang kini nga gawas kang eight division world champion Manny Pacquiao, sikat na usab sa tibuok kalibutan ang kamaayo sa uban pang mga Gensan boxers.
Dili usab matud pa mapakyas si Rigondeaux gumikan pulos mga disiplinado ug kugihan ang upat ak Pinoy boxers.
Dugang pa ni Antiporda, dakong oportunidad kini alang kanila, hilabi na nga gawas sa libreng training sa gawas sa nasud, na-expose usab sila sa international crowd, hinungdan nga dakong bentaha kini alang sa upat nga boksingero.
