GENERAL SANTOS CITY-Adunay hatud nga “chilling effect” ngadto sa mga nalambigit sa iligal nga druga, ang gipahigayong raid kagahapon sa kaadlawon sa mga balay nga panag-iya sa mga Parojinog sa Ozamiz City.
Kini ang gibutyag sa inilang abogado sa dakbayan nga si Atty. Rey Cartojano.
Matud niini, human sa insidente posibleng daghang mahadlok tungod walay santuhon ang otoridad, sibilyan man o adunay posisyon sa gobyerno basta nalambigit sa druga.
Gibutyag ni Atty. Cartojano, ang Ozamiz City, usa ka lugar nga walay gustong muhilabot ilabina sa druga apan gipakita sa mga otoridad nga mulihok gayud sila isip pagsunod sa kamanduan sa Pangulo batok sa iligal nga droga.
Luyo nga lehitimo ang gipahigayong raid apan angayang adunay mga lig-ong basihan niini ang otoridad aron dili maakusahan nga hinimu-himo ang operasyon.
Sa pahayag ni Atty. Cartoano, dugay ng gi-warningan sa Pangulo ang mga Parojinog nga nalakip ang mga pangalan sa listahan niini sa nalambigit sa illegal drug trade sa nasud.
Kahibaluan, ang raid nagresulta sa pagkamatay sa matud pa narco-politician nga si Ozamiz City Mayor Reynaldo Parojinog, og lain 13 katao human nga unang gipabuthan matud pa ang mga PNP personnel sa mga sakop sa mayor og dinhi na mibalos og buto ang mga pulis.
