Gibawal gihapon sa Bureau of Fisheries and Aquatic Resources (BFAR) ang pagdakop og pagkaon og isda sa probinsya sa Cavite.
Sumala sa ahensya, dili pa panahon nga tangtangon ang fishing ban sa maong probinsya og makabalik ang mga mananagat sa pagdakop niini.
Gihimo sa ahensya ang pahayag sa gipahigayong hearing sa Senate Committee on Environment ni Senadora Cynthia Villar.
Dinhi gibutyag ni Atty. Angel Encarnacion sa BFAR nga base sa ilang ulahing sampling nga gipahigayon, nagpabilin gihapon ang presensya sa lana sa katubigan niini.
Wala usab silay tukmang datos kung kanus-a mahimong tangtangon ang fishing ban sa probinsya.
Mahitabo lamang kini kung mugawas sa ilang ipahigayong test nga wala nay lana nga mihalo sa tubig dagat sa maong lugar.
Kahinumduman nga nalunod ang MT Terranova sa Limay Bataan atol sa bagyong Carina og Habagat rason aron magmugna kini og halapad nga oil spill nga miabot usab sa mga kasikbit nga probinsya sama sa Cavite.
Gituohan nga mukabat sa 1,400 tonelada sa lana ang unod sa maong nalunod nga barko.
