Dili kini binuang bisan pa og sama kini og usa ka eksena sa komedya, usa ka kompetisyon sa pagkalot og lubnganan ang gipahigayon sa usa ka sementeryo sa Hungary diin 38 ka partisipante ang misalmot niadtong Sabado.
Giorganisar sa Hungarian Association of Cemetery Maintainers and Operators ang maong kompetisyon aron ipakita ang kahibalo ug kahanas sa trabaho sa mga nag-atiman ug nagkalot og lubnganan, ingon man aron mawala ang mga bawal ug kahadlok nga nalambigit sa kamatayon.
Sa public cemetery sa Nyergesújfalu sa amihanang Hungary, gihagit sa uga ug gahi nga yuta ang 19 ka grupo nga adunay duha ka miyembro matag usa samtang nag-unahay sa pinakapaspas ug pinakanindot nga pagkakalot sa lubnganan.
Matud ni Róbert Nagy, nga midaog uban sa iyang kauban nga si László Kiss, mas importante ang kapaspas sa pagkalot, apan kinahanglan gihapon nga tukma ang sukod ug hapsay ang pagkahimo sa lubnganan kung gamiton kini alang sa lubong.
Nakompleto sa duha ang ilang lubnganan sulod sa usa ka oras ug 21 minutos, subay sa sukod nga 1.6 meters ang giladmon, duha ka metros ang gitas-on ug 0.8 metros ang gilapdon.
Nakadawat sila og cash prize nga 200,000 Hungarian forints o kapin $640 dollar.
