GENERAL SANTOS—Nagpaklaro si Dr. Ryan Aplicador, Chief of Hospital sa Dr. Jorge P. Royeca Hospital kon DJPRH kung nganong nalangay ang pag-operate sa molecular labolatory dinhi sa dakbayan.
Gibutyag niini nga hangtud sa pagkakaron wala pa nahuman sa level 2 application ang nasampit nga laboratoryo.
Sumala pa sa nasampit nga opisyal nga usa sa mga rason nganong nadugay ang aplikasyon sa nasampit nga laboratoryo tungod sa problema sa mga consultant ug mga supplier.
Nasuta nga nakatakda unta nga maka-abot sa GenSan ang mga supplier ug mga consultant gikan sa Manila sa una nga semana sa bulan sa Agusto apan tungod matud pa sa rason nga gipapailaom sa MGCQ ang Kauhohang Manila hangtud sa karon wala pa kini nakaabut sa syudad.
Wala usab giinggon ni Dr. Aplicador kung kanus-a mangabut ang mga nahisgutan.
Hinuon gipaklaro nga andam ug nakahuman na sa training ang mga mid-tech ug gihulat na lamang ang mga consultant nga mangabot dinhi sa syudad.
Kahibaloan nga gigahinan ug dakong pondo sa lokal nga panggamhanan dinhi sa dakbayan ang pagpatukod sa nasampit nga laboratoryo.
