GENERAL SANTOS CITY – Dili na gusto mag-antos sa pipila ka mga pamilya sa mga biktima sa Maguindanao Massacre og laing napulo na usab ka tuig aron makuha ang damyos nga gipasalig kanila human nasilotang guilty ang mga akusado.
Kini ang gihingusgan ni Elliver Cablitas sa pakighinabi kaniya sa Bombo Radyo GenSan.
Sumala pa niini, ang iyaha lang pangandoy nga makab-ot ang hustisya ug kini nahitabo dihang nakombikto ang mga primary suspects nga mga Ampatuan og uban pang mga nalambigit sa masaker.
Gibutyag nga ang iyaha lamang hangyo sa pagkakaron matabangan sila ni Pangulong Rodrigo Duterte nga himuong prayoridad ang paghatag og damyos sa mga pamilya.
Sa iyang pamahayag, sigurado nga malipay pagmaayo ang kada pamilya kung mapahimuslan nila ang madawat nga salapi samtang sila buhi pa.
Apan dismayado si Cablitas sa pagsumite matud pa og mosyon sa kampo sa mga Ampatuan aron mapaubsan ang kantidad sa damyos nga angayang ibayad sa matag nahibiling pamilya.
Sa pamahayag pa ni Cablitas, kung nasayod lang unta sila nga dugay kaayo ang proseso aron madawat ang damyos ilaha na lang unta nga gidawat ang tanyag nga kuwarta sa ilaha kaniadto.
Samtang, sa gipadangat nga impormasyon ni Ian Perante Jr kabanay sa usa sa mga biktima nga adunay ipahigayon nga misa sa Forest Lake Cemetery kung asa gilubong ang 12 ka miyembro sa media nga namatay sa masaker.
