Nagkadaghan ang mga dagkong opisyal sa gobyerno nga nagtuo nga dunay panagkunsabo sa pipila ka ahensya sa gobyerno aron makaikyas ang napalagpot nga mayor sa Bamban, Tarlac nga si Alice Guo.
Unang gibutyag ni Sen. Risa Hontiveros ang posibleng pagpa walay bili sa mga tinugyanan sa balaod aron maka ikyas si Guo ug uban pa niyang mga kauban nga nalambigit sa operasyon sa Philippine Offshore Gaming Operators (POGO).
Matud ni Senador Gatchllian nga daw gitago sa Bureau of Immigration ang pagbiya ni Guo kauban ang mga indibidwal, apil na sila si Cassandra Li Ong ug Sheila Guo, nga bag-o lang nahibalik sa Pilipinas, butang nga matod niya kinahanglang imbestigahan.
Sa bahin ni Justice Secretary Jesus Crispin “Boying” Remulla, kinahanglang adunay manubag sa ‘pagpabaya’ nga nahitabo mao nga nakagawas na gyud sa Pilipinas ang gitaktak nga mayor.
Kaniadtong Lunes, Agosto 19, si Sen. Risa Hontiveros niingon nga si Alice Gou, nailhan usab nga Chinese national nga si Guo Hua Ping, milayas niadtong Hulyo 18, 2024 paingon sa Kuala Lumpur, Malaysia.
Gikan sa Malaysia, si Alice gikatahong milarga paingon sa Singapore diin iyang nahimamat ang iyang amahan nga si Guo Jian Zhong, inahan nga si Lin Wen Yi, igsoon nga si Wesley Guo ug negosyanteng si Cassandra Ong, ang giingong representante sa giatake nga POGO hub sa Porac, Pampanga, ug ang Lucky South 99.
Base sa pinakaulahing report sa Bureau of Immigration, si Alice Guo ang anaa pa karon sa Indonesia.
Ang iyang igsuong babaye, nga si Shiela, ug ang negosyanteng si Cassandra Ong, nadakpan usab sa Indonesia, kinsa nibalik usab sa Pilipinas karong semanaha.
