GENERAL SANTOS CITY – Gilaumang mahanaw na sa mga kadalanan ang mga gapanglimos ilabina sa sentrong bahin sa dakbayan, mga simbahan og palengke.
Kahibaluan nga aprobado na sa 3rd og final reading sa sangguniang panglungsod ang mendicancy law o ang pagdili sa pagpanglimos sa dakbayan, kinsa author niini si Kagawad Edmar Yumang.
Matud sa konsehal, sa maong ordinansa, walay exemption tungod ang gapanglimos nga hamtong ug ang gahatag ug limos ang pulos pinahan kung madakpan.
Kung ang bata ang nanglimos, i-rescue kini sa barangay og dad-on ngadto sa CSWDO. Samtang kung ang bata ang gigamit sa mga ginikanan nga manglimos angayang magmulta ang mga ginikanan.
Ang maghatag og limos ang magmulta usab og P500.
Ang usa sa tumong niini aron malikay sa disgrasya ang gapanglimos nga anaa sa mga kadalanan og maluwas ang mga gagmayng bata nga gigamit aron manglimos.
Apan ang maong napasa nga ordinansa nga ipasa pa sa buhatan ni Mayor Ronel Rivera og kung aprobado na kini, imantala sa lokal nga gobyerno aron hingpit nga mahimong balaod.
